كنا من زمان شله واحدة وحبايب في حارة واحدة
المهم............تخرجنا من الثانوي.
زمايلي كلهم كملوا دراستهم بأمريكا
وتخرجوا ورجعوا لمصر ويشتغلوا الآن في شركات كبرى.
إلا أنا مسكين قاعد بينهم متخرج من جامعة مصرية وموظف حكومي بالواسطة.
دائما في أوقات تجمعاتنا الإسبوعية يقعدوا يتكلموا ويضحكوا وأنا مش عارف معنى كلامهم.
واذا سألتهم يردوا علي بتعجب: 'معقولة مش عارف؟'
إلى أن أصبحت أتكسف لما أسألهم.
وبقيت عامل نفسي فاهم معاهم
إذا ضحكوا ضحكت معاهم
وإذا إستغربوا أستغرب معاهم
مرة كانت قاعد معاهم
وأسمع حكاويهم
يقول واحد منهم: مدير الـ HR عندنا مغرور وشايف نفسه والمشكلة ان إدارته لاتهش ولاتنش
يرد ثاني : طيب فين الـ MD؟ مش بيتدخل بينكم؟
الأول : هو مشغول باجتماعات مش بتنتهي مع الـ CEO. وإحنا متورطين مع جماعة الـ IT، مش قادرين نتكلم معاهم خالص.
الثالث يشارك : أوه.. دولا أشغل ناس .. دايماً الـ KPI بتاعهم ضارب في العالي.
الرابع : يا جماعة إحنا في 'الويك إند'.. لازم تتكلموا في حاجة ثانية.
أتنهد وأقول في نفسي: الحمد لله جاء دوري في الكلام ودلوقتي حابدأ أدخل بحكاية حلوه ولكن فجأة
يسأل واحد منهم: إيه أخبار الـ FM؟
الثاني : تعبان، عشان ال IPO الأخير جاء على غير المتوقع، وما ربحنا فيه جنيه واحد
الأول : قلت لك أن ده زمن العقارات.
أقول في نفسي: العقارات؟ الحمد لله أعرفها دي ....وأنا لسه بأقول الحديد رخص وأسعار العقار حتنهار لكن برده فاجئني واحد وقال
فيه شقق للإيجار في الـ MR يا شباب؟
الثاني : طارت الطيور بأرزاقها.
قلت في نفسي ...حلو اللي ما قال TTB، طارت....الطيور ...بأرزاقها
يقول أحدهم: اتركوا العقارات وخلونا نتكلّم عن الزحمة في الشوارع.
- إمبارح أعوذ بالله كنت على المحور ، مستحيل الواحد يمشي ب Rush hour وبدأت الزحمة قدّام الـ IC.
- وأنا كنت في طريقي للـ DL وبقيت ساعتين في زحمة طريق الواحات.
يخلص الكلام عن الزحمه، ويبص لي واحد منهم ويقول:
إلا إنت عملت إيه .... ليه مش بتاخد الماستر' في الـ MBA؟
أقول في نفسي: أكيد أنه يقصد 'الماستر كي' ....
بس غريبة..... إيه دخل المفاتيح بالموضوع ؟؟؟؟
بس تداركت ان الموضوع مش مفاتيح واني ضايع في المعمهة دي......
وما عرفتش أرد
وقلت : ما أقدرش.
رد ثالث : ما تقدرش ؟؟؟؟ ليه - كم كان الـGPAبتاعك؟
يا ربي هو يقصد إيه ............قلت لازم أعمل مشاركة وربنا يسترها بقى
أرد عليهم : مش فاكر، بس أظن إنه 'أوتوماتيكي'.
يضحك الجميع ويعتقدون أنني أمزح. ولما جاء وقت العشاء لقيتهم بيقولوا:
- مطعم هندي.. لا مكسيكي.. لا شامي.. قال واحد يا جماعة اشتقنا إلى الـ KFC.
كلهم وافقوا وقعدوا يبصوا عليا منتظرين رأيي،
قلت لهم: أنا باروح للبيت وأنتم روحوا للـ JWM.
قالوا: شو هذا JWM!!
قلت : 'معقولة مش عارفين JWM ؟'
ضحكت ومشيت من عندهم وما عرفوش معناها
شرح الاختصارات:
HR: الموارد البشرية..
MD: المدير التنفيذي...
CEO: الرئيس التنفيذي...
IT: تقنية المعلومات...
KPI: مقياس مؤشر الأداء...
FM: سوق الأوراق المالية...
IPO: الاكتتاب...
MR: مدينتي ريزدنس...
IC: القرية الذكية...
DL: مدينة دريم لاند...
GPA: المعدل التراكمي...
MBA الماجستير في إدارة الأعمال
KFC: كنتاكي...
أما
JWM: جهنم وبئس المصير.
ليست هناك تعليقات:
إرسال تعليق